بتحرك شَفايِف

هي الناس بتضحك ولا بتحرك شفايف
قلبي و عقلي و لساني من النطق خايف
ان نفسي أمشي مع خلي وحدي
ولا ده يقول ايه ده ولا يقول عجايب
لا صح نافع ولا حتي غلط بيردي الحبايب
وشوش بشوفها بننكرها واحنا حافظينها
و وشوش لأول مرة بنعرفها
نعشقها أول ما نسمع كلمتها
و نركز أوي مع همستها ,يمكن شدتنا ضحكتها


وايش ضمنك يا اهبل يا خايب
مش جايز تكون ضحكة عقارب


اهو انت كدة شكاك جبان مغفل عبيط
تخاف من ضلك
وماشي جوة الحيط قال عامل حويط

طب اصبر و اسمع الحدوتة
يمكن من موتي تستفيد

اهو حتة اللحم الحمرا اللي بتدق ديت
يامافتحت للي بيخبط عليها
ويسأل سؤال
كان القلب يستقبل كل تايه ..... شريد
كل عاشق ......معذب....... وحيد
إن كان صاحب ولا محبوب ولا حتي واحد عرفته جديد
من غير ما بسأل ولا اعرف عنه حاجة
اسيبه ياخدله من فكري مكان
يجري و يلف فيه و يسهر أو ينام
كنت فاكر زيك الدنيا حلوة و الكون جميل
والورد أبيض مزهزه و الشمس بتطلع بعد ليل

اتاري الحال زي التاني لا عارف
صبح من مسا من عصاري
تنام .. تقوم .. تاكل .. تصوم..
كله محصل بعضه و الكل جاري.

موهوم يالي فاكر لسه في أمل
و ياريت بلاش تقول طب ايه العمل؟؟
ماعدش يفيد ندم عالعمر اللي راح
اسمعني و بلاش لما الدنيا تضحكلك ترتاح
ولا تفتح قلبك لأي حد والسلام
ولا تخلي مخك ينخدع بمعسول الكلام

خد الخلاصة ولو عايز تعدي
دايماً لازم تبقي –فالدنيادي- مادي!!!
دا انا يابني كلي انكويت و اتبهدلت و اتهريت
و القلب اللي كان زي الزهر أحمر
بديع اسود تحت نار البشر
ما اتبقي منه غير نقطة دم واحدة
وريتك بيها الحقيقة و الألم
يمكن تطلع راجل و ما تعملش زيي
عشان تعرف تعيش