وقت فجرية والناس نايمة وشوية والناس قايميين يصلو ، وناس يجهزوا لشغلهم كانهو بيقفل سوستة الجاكت الاحمر عشان برد الصبح حياكل عضمة الطري بص شوية في المراية المكسورة مالقاش صورتة فيها لقي واحد منكوش شعره, ودقنه مش محلوقة وشكلة مجرمين حط المفاتيح في جيبة ونزل السلم بالراحة واتكعبل زي العادة في السلمة اياها المكسورة اللي بتفكره بكل حاجة مكسورة في حياتة المدغدغة بدراسته اللي فاشل فيها ومحاضراته اللي ما يفهمش منها حاجة والكلية اللي مش عاوزها وحبيبته اللي مش عارف بيحبها ولا لأ وامله في المسرح اللي مش عارف يوصله وأمله في كل حاجة اللي ما بتجيش وحريته اللي مش واخدها في اي حاجة لا في كلامه اللي بيقوله ولا في لبسة اللي بيلبسه ولا في وقت نومه وصحيانه ولا صحابه اللي بيحبهم، وهما بيبيعوا ولا واخذ حريته في احلامه اللي بيحلم بيها كل ما يعرف ينامله ساعتين علي بعض بيحلم ببيت في جزيرة وسط بيوت ناس بتعرف تحب , بتعرف تفهم ناس ممكن تدخل جواك وتقرا حاجات ممكن ........ ناس ما بتاخدش باللي من بره, جزيرة شمسها لما تطلع ما تستخباش ورا دخان مصانع ولا قمر بيتكسف يعاكس بنات حلوة علشان خايف من ناس فاهمين دين ربهم غلط ويقوله عليه كافر وخارج من المله ناس عارفه يعني اية يمشوا تحت المطر وتتمني اللي هي عايزاه ويقولوا لنقط الميا اللي نازلة تزرع شجر يطرح امانيهم عشان يقطفوها ويفرحو بالجني وقت الحصاد جزيرة فيها الناس زي
كيس الشيبسي بالملح من غير اي لون صناعي ومكسبات طعم بطاطس عارفة هي ايهجايه من ايه ومحطوط عليها يادوب شوية ملح عشان يطعموها زي البنت اللي اصلا جميلة ومش محتاجة غير يادوب مسحة قلم كحل خفيفة حوالين عنيها مش زي بقية البنات بتحط و1/2 اسمنت و½ معجون وتروح لاطخاه علي وشها .......احمر علي اصفر علي اخضر ناس زي كيس الشيبسي بالملح مش زي باقي الاكياس بالوان وطعم يتغير حسب المزاج جزيرة ما فيهاش كلام يتقال من وراء الظهر يجرح مع انه لو اتقال في الوش ممكن يفيده مافيهاش اللي فاكر علاقة الواحد بواحده هي جنس وبس .
بيحلم بجزيرة مكان ما فيهوش ذل وسب دين عشان ياكل لقمة تصلب طوله ولا واحد ينزل من عربيته يضربه علي وشه وتنزل دمعته جواه تحرق دمه من جواه وتفضل جواه مع ان اللي ضربه هو اللي خبطه بعربيته ابن وزير وهو حيا لله جده غفير .
وبرضه تفضل دمعته جواه عشان ضهره عريان اللهم إلا من الفانلة كان جايبها بكام جنية على قد حاله
عدي السلمة المكسورة وخرج من العمارة اللي من غير بوابه ، لهفه البرد في جسمه اللي زي قلم الرصاص المقصوف سنه ، شاف لما خرج كلب جربا ماشي لوحده في البرد وشكله غلبان ضحك وقاله "إحنا أصحاب ، إنت غريب وأنا غريب بس إنت يا بختك مش حتفضل غريب أول ما أصحابك الكلاب يصحو خلاص ، لكن أنا ما ليش أصحاب يصحو ، "أنا غريب مش عارف لأمتى".
مد إيده في جيبه لقي جنيه فضة ، دور على الكشك يجيب منه سجاير فرط مالاقش ، فضل ماشي وعياطه مغرق وشه ، هو نفسه مش عارف بعيط على ايه وألا ايه ؟
راح كشك تاني لقاه بطل يبيع سجاير وربى دقنه وقصر بنطلونه ورفعه لحد ركبته ورايح يصلي الفجر، كان ناوي يصلي شافه ؟؟؟؟؟؟؟ كمل طريقه طوالي .
بعديها لقى قهوة كحيانة فاتحة والصبي نايم على كرسي صحاه بالراحة وسلم عليه وطلب حجر قص وطلع الورقة وكتب وقال يمكن حد يقرا ...
