جايز يمكن يجوز

كلامي ليكي .... سمعاني ؟

ماتقوليش

اني لسّاني حابعترلك شوية حُب

و ارسملك قلب

فـــ قلب كُراسي

و أسيب ناسي

و أسكن فيكي

أحلم بيكي

و أصحي بعديها

بقطع جوة الروح ؟؟

حاروح وياكي تفتكري ؟

عشان عينك بتخطفني ؟

ولا عشان حبي لصوت موال

في لـيـل يتقال و يتغزل

في لون طيفك

و نسمة عبيرك

الــ بتدوّخ

ماتقوليش انك بتنهدتِك

و بدلال رمشك فــمشواره

ما بين بصة و التانية

تخليني أرجع أتغزل

في صبية من بنات حــــوا !!!

ماتقوليش إنك هزيتي من جوة

كيان مجروح م اللي فاتو قبلِك

و فاتولي وردة دبلانة جوا كتاب

مابفتحهوش !!

طب ليه مانيش طايق انا بُعدِك ؟! ؟

و ليه بستني فـــ مواعيدِك

كما العطشان في أرضه البور

و مستني المطرة ف عز الصيف

و مانيش عايز اعيش حُبِك

يجوز خايف

عشان القلب متعوّر

و ما املكشي ف روحي مكان لذكري كمان

و قلقان العُمر يتهدر

حالف و أدور و مش حاوصل لغير عشقِك ؟؟؟

يمكن ؟ و مين عارف ؟

يا أكون حابّك , يا أكون واهم

!!!!!!!